وسجل معنا لنثري معاً هذا الفضاء بالحب والجمال والإبداع...
دعــوة للجمــيع "جلسـة تعارف"
::My:
من طرف تذكير بمساهمة فاتح الموضوع :
بسم الله والصلاة والسلام علي رسول الله
انتو ياناس المنتدى كلكول دي شنو ولاكلكول ده منو ومن أين اتت هذه التسمية طبعاً ده سعال حائر في عقول جل الشباب اذا ما كان كل الشباب من الجنسين وما دون سن الـ50 يعرفون سر هذه التسمية وأصلها.غايتو الحاجةالعامة والسائدة في أواسط الشباب تكمن في روايتين و ماعارفين حقيقة الروايتان ـ
أولاً بقولو ا في واحد خواجة اسمه المستر كول ، ومن هنا أتت التسمية ، وهذا قول مردود على أصحابه لان وببساطة شديدة كلكول أقدم من الكسرة قديمة قدم التاريخ يعني أقدم من الخواجه زاتو ـ
ثانياً وهذا الكلام سمعته من من يوثق بروايته وهو من المهتمين بالتاريخ يقول ان كلمة كلكول تعني بلهجة الدناقلة الكسرة والكرم والحمد لله ناس كلكول كلهم كريمين ، لكن برضو هذا القول ضعيف لسبب أن كلكول ليس بها دناقلة لكن إحتمال أنو الدناقلة جوها عابرين ثم بعد ذلك رحلوا الى المناطق الاخري ـ
ولاأقول ليكن خلونا من الاسم ، طيب أول قبيلة دخلت القرية وكونت هذا النسيج الجميل المترابط طيب المعشر والاصل ، في هذا أيضا روايتان
الاولى دخول قبيلة الشكرية المعروفة وكانو يردون ماء كلكول بحكم مهنتهم الرعي عنما كانت كلكول في الضفة الشرقية للنيل الازرق قبل أن يتحول عنها النيل (يعني زعلان يانيل ولاشنو ) ولاكلكول هي الرحلت وخلتك كلكول رحلت من الشرق للغرب ـ دي والله معلومة جديدة في حد عارفها وكلكول عندما جات من الشرق لم تترك أي جزء هناك في الشرق طبعاً قال ليك كلكول دي كانت حنينة جداً ومادايرة تخلي جزء وراها عشان ماتكون كلكول الشرقية وتكون متعبة للناس يعني أهل هنا ونسب هناك ، اسي كان لاقدر الله وجا بكا ساكت ـ ياخي قول عرس مالك انت شوم كده من الصباح خلاص قلنا عرس وأن كان البكا هو البجهجه الناس يقعدوا يفتشوا العربية والكارو والبرينسة ـ دي حاجات قديمة بعرفها عمكم عامر علي ـ المركب جات المركب ماجات البحر زايد والبحر ناقص والهوا والطين والغبار ياخي دي شغلت شنو . عشان كده عرفتوا كلكول أحن عليكم من الحنان زاتو وأعطف من العطف ـ المهم يازول خلينا في موضوعنا قال ليك الشكرية رحلو داخل البطانة وأحتمال تكون كلكول هي الخلتهم بالشرق ،والله أعلم
والرواية الثانية . اول قبيلة سكنت كلكول يقال لهم العنج وديل الظاهر ناس السلطنة الزرقاء ويقال أنهم كانو ناس طوال جداً لدرجة الواحد مابتعب لما يتناول الصمغ من شدر ودأبراهيم يعني لاجباده ولاطلوع شدرة ـ دي محن عمكم عصام الدرديري ـ
ورواية أخر ييعني سامعها طشاش طشاش أنو سكنوها العبدلاب ودي يفتيكم فيها أخونا عامر عجيب ـ
لكن الحاجة المتاكد منها ميه الميه ــ ـ ـ كلكول الحاضر والماضي والمستقبل ـ قاصد مستقبل الشباب ما أنتو ياأولاد الدفعة ـ كلكول شدر ودأبراهيم والغابة وكلكول شدرة أمسترين وشدرة الزاكي وشدرة أحمد ودسليمان والبقر والريافة والفادنية وفريق الضو والقون والنادي والتبس وشدرة البكري أبوحراز والجروف و النخل وعشة دانقا ومدرسة كلكول الابتدائية المختلطة والخريمة شدرة العيد الالفة والمحبة لاقبلية ولاجهوية بس ـ كلكولية ـ يعني أيا كان الاسم ومعناه والقبيلة الحمد لله الذي أخرج منا نسيج مترابط متعاون في الهينة والقاسية ـ بسوصيتي لكم ـ ـ يالمغتربين عن أرض الوطن ما تقصروافي حق كلكول وأهل كلكول أدوها بقدر ماأدتكم ـ وفتشوا أي قاموس بتجدوا قبيلة كلكول ـ
معليش طولت عليكم بس دايرين مؤرخ يوثق لنا ماتبقي من تراث القرية وتعريف الاجيال الحالية والقادمة باذن الله بعظمة موطنهم الصغير ـ
في الختام الشكر موصول للقائمين على أمر هذا المنتدى النافذة الالكترونية على العالم وعلى راسهم الاستاذ عامر عجيب وأخوته الطيبن ـ ـ ـ
» نكتة قديمة لنج
» خاطرة
» اقتصاد القرود...!
» من اقوال الفلاسفه والادباء عبر العصور
» المحتال وزوجته الغباء مصيبة
» نوا فى رمضان
» محتال كدا
» شوفوا الراجل دة حكيم كيييييف
» الانتخابات