امراة لامبالية كتب:

رغم اني ما بفهم كتير في السياسة بس فكرة الوحدة بين الشمال والجنوب شكلها شبه مستحيلة لأنو ودا كلام ناس السياسة ما كلامي مافي حاجة تخلي الوحدة دي جاذبة عشان اساساً مافي نقطة تلاقي بين الشمال والجنوب عشان ما إبدو بيها مشوار الوحدة وانو كل النقاط محسوبة لصالح الانفصال يعني ناس لا دينا واحد ولا ثقافتا واحدة ولا حتى عاداتا وتقاليدا واحدة دا كمان اضافة لي انو ونحنا صغار اهلنا دخلو في راسنا فكرة انو الشمالي احسن من الجنوبي ودا خلانا كشماليين نعاين للجنوبي من فوق كمان الجنوبي إتربى على انو الشمالي ماخد حق ما حقو وانو ظالم وانو وانو وانو دا كمان خلى انو يكون في حقد من الجنوبي للشمالي

وفوق دا كلو جات اتفاقية 2005والخلت الجنوبين يفتكرو انهم بيها حيكونو اسياد وباقي الناس عبيد كيف ح تحصل وحدة في جو زي دا!!!

حتى اذا حصلت وحدة حتكون وحدة علي قول الساسة وحدة شكلية نغش بيها روحنا انو نحنا ورغم الاختلافات لسة متوحدين ووحدة زي دي اخير منها العدم

اما الانفصال اذا حصل فأكيد اذا حصل ح يكون في صراع بسبب الحدود بين الشمال والجنوب دا غير الصراع الجنوبي الجنوبي والبدت ملامحو تظهر حتى قبل الانفصال

انا ما انفصالية وعايزة وحدة بس ما تكون وحدة شكليةً