لما أفكر...
في المسافة البيني بينك،
والزمن
ولما
أحسب...
أتعس اللحظات بدونك،
وارسم الأبعاد على ورق الشجن
أدرك
إنك...
كيف بعيدة!
يا بعيدة وفي الحقيقة...
أنتِ في دنياي قريبة،
وليكي
في جواي وطن

يا بعيدة ويا قريبة...
ويا وتر مشدود على نَفَسْ
الزمن،
لحنك الدقداق شدهني،
تمردت خيلي العنيدة،
وفي الطريق ضليت
مِفَارِقْ...
لا عرفت أتم كلامي،
ولا بلاك طاب لي سكن

ما المسافة
البيني بينك يا منايا...
مددت عمر العذاب،
قصقصت روح الحنين...
الإندفن في
جوفي يتحسس صداك،
وأشواقي ليكي تقافزت في مهرجان...

يا بعيدة...
وحبي
ليك ما ليهو حد،
ما ليهو عد... من غير تمن!
ديمة اشتاق لعيونك،
واحة الحلم
المزعزع...
بين مدارات الزمن
وديمة تواق ليهو طيفك...
في عيوني رسم
ملامحك،
وفي كياني رِبا وقطن

كل الود،
المانجلك؛