وطني الكبير للشاعر الاستاذ عباس الطيب الهادي

يا وطني الكبير تحيا وتعيش لينا
ترعاك العناية ونسعد في وادينا
..................
الشعب العظيم الليلة هب وثار
والزحف المقدس قادو في اصرار
صادق في كلامو قال نخوض النار
ونقابل بالصدور المكنة ومدافع النار
عاش الشعب عاش لحماية الاوطان
سودانية سود مابهية ماالوان
بنقيف فى الحدود ونقابل النيران
ونثبت كالجبال لنصرة السودان
ياوطنى الكبير وطن الابى والجد
وحالفين باليمين لازم نقيف فى الحد
الوطن العزيز بنيانو مابنهد
والنيل صافى يجرى بى هينة مابنسد
نحن اولاد بلد سودانا مابندى
بالسيف والقلم والراى دوام نحمى
شن صعب الامر ايانا راكزين لى
والنار كان ولعت الحر بصون وادى
وطنى بمجدو على سائر الاوطان
وبرفعو فى زحل فى اعلى اعلى مكان
شعبك منتصر لاشك يا السودان
وبهتف بحياتك يا مهبط السكان

حامى الديار الشاعر الاستاذ عباس الطيب الهادى
مابهاب الموت والردا
وشتت كتائب العدا
جيشنا.............مدخور ليوم الفدا
هب قام سمع الندا
وفى كلمتو مااترددا
حصون الاعدا بددا
وشرقاوغربا حددا
حالف يمين متيمنا
لى دارو يحمى يامنا
قول الدخيل ما بهمنا
وفوقو بنكسر سمنا
حامى الديار والحدود
وارض الخال والجدود
اطراك ديمة يا امخدود
وبركز بقيف فى الحدود
جندينا مدرك للنظام
يعجبك سمح يوم الصدام
ما بهاب الموت الزؤام
يموت فى العز ميتة كرام
فخر السودان والشعوب
جيشنا يا الحبس الدروب
الدارس فن الحروب
بفرج الهم والكروب

مشكور المحجوب علي امتاعنا بشعر الاستاذ عباس الطيب
حقيتا دوما نتظر طلاتك الجميلة علي ناروانت تزين سماء كلكول كالنجم الثرمدي وهذا من طيبت اصلك فالذهب عمرو ما يصدي ..
والتحية لك وللاستاذ عباس
تحياتي
ودماسا